tikapurfm

शिक्षा स्वास्थ्यमा ठूलो लगानी भएपनि बालविवाह नियन्त्रण चुनौतीपूर्ण

भजनी नगरपालिकाका नगर प्रमुख केवल चौधरीले बालबालिकाको शिक्षा र स्वास्थ्यमा ठूलो लगानी गरे पनि बालमैत्री पालिका बनाउन पूरा गर्नुपर्ने सूचकहरु पूरा गर्न कठिनाइ भएको बताउनु भएको छ ।
बालबालिकाका क्षेत्रमा नगरपालिकाले गर्दै आएको खर्चको बारेमा बाल कल्याण संघले भजनीमा आयोजना गरेको समिक्षा कार्यक्रममा प्रमुख चौधरीले यस्तो बताउनु भएको हो । प्रमुख चौधरीले गरिबी भन्दा कूलत र बालविवाह गरेर विद्यार्थीले पढाइ छोडनु चिन्ताको विषय भएको बताउनु भयो ।
गैर सरकारी क्षेत्रको लगानी र सहयोगको प्रशंशा गर्दै नगरप्रमुख चौधरीले सामाजिक समस्याको समाधानका लागि सबै क्षेत्रको साझेदारीको अपेक्षा गर्नुभयो ।
भजनी नगरपालिकामा विद्यार्थीले बिचैमा पडाइ छोडने र बालविवाह गर्ने बालबालिकालाई रोक्नु चुनौतीपूर्ण छ । महुन्याल माविका प्रधानाध्यापक विद्या प्रसाद भट्ट बालविवाहपछि जन्मेका बालबालिका, नागरिकताविहीन अभिभावकका सन्तानहरु, भारतमा हुने विवाहका कारण गत वर्ष ६४ र यस वर्ष ३२ बालबालिकाो जन्म दर्ता नभएको र उनीहरुलाई दिएका पाठयपुस्तक र दिवा खाजा बेरुजु आउने गरेको बताउनु भयो ।
समिक्षा कार्यक्रममा स्वास्थ्य शाखाबाट छत्रबहादुर बुढा, शिक्षा शाखाबाट देवराज अवस्थी, महिला बालबालिका शाखबाट ऋजु चुकाहा लगायतले नगरपालिकाबाट ती क्षेत्रमा भएको बजेटको बारेमा जानकारी गराउनु भएको छ । बालकल्याणले वर्षेनी बालबालिकाका क्षेत्रमा विगत वर्षमा भएको खर्चको समिक्षा गर्दै चालू वर्षको बजेटको विश्लेषण गर्ने गरेको बाल कल्याण संघका सोनु चौधरीले बताउनुभयो ।